Հայերեն | На русском | In English
Զորամասի վարժադաշտում բացազատված ուսումնական կետերում կուրսանտները՝ բանակի ապագա տանկիստները, մեքենավարման, հրաձգության, հոգեբանական արգելագոտիների հաղթահարման գործնական պարապմունքներով իրենց հմտություններն են կատարելագործում:
-Կատարում ենք առաջին ուսումնական հրաձգության վարժությունը՝ ցերեկը և գիշերը շարժվող նշանակետերի վրա: Մինչև կրակային վարժանքներն սկսելը անձնակազմին ծանոթացնում ենք վարժության անվտանգության կանոնների պայմաններին: Մեր գլխավոր նպատակը անձնակազմի՝ հակառակորդին շուտ հայտնաբերելու և արագ ոչնչացնելու գործնական հմտությունները զարգացնելն է,- մեզ հետ զրույցում ասաց դասակի հրամանատարի տեղակալ Անուշավան Եղիկյանը:
Կարճատև դադարի ժամանակ զրուցեցինք կուրսանտներից մի քանիսի հետ:
-Այս պահին սպաները մեզ սովորեցնում են ինչպես տարածքը հետախուզել և հակառակորդին հայտնաբերելու դեպքում ինչպես վերջինիս արագ ոչնչացնել,- ասաց ժամկետային զինծառայող, շարքային Ռաֆայել Ասրյանը:
-Կատարելագործում ենք մեր հմտությունները: Մեզնից կախված ամեն ինչ անում ենք՝ լավ տանկիստ դառնալու և մեր բանակին պիտանի լինելու համար,- ընկերոջ խոսքն է շարունակում շարքային Համբարձում Մինասյանը:
Այցելեցինք թիվ 1 ուսումնական կետ, որտեղ հետևակի մարտական մեքենայի անձնակազմին ուսուցանվում էր «Կալաշնիկով» տանկային գնդացրի ոչ լրիվ քանդում և հավաքում վարժությունը, ինչպես նաև գնդացրի մարտավարատեխնիկական բնութագիրը և ըստ վայրկենաչափի ուսումնական վարժության նորմացույցները:
-Տեխնիկան արագ և ճիշտ սպասարկելու գործնական հմտություններն ենք զարգացնում,- ասում է կուրսանտ Աշոտ Հովհաննիսյանը, որը ուսման երեք ամիսների ընթացքում հասցրել է աչքի ընկնել բարձր առաջադիմությամբ, և նրան վստահվել է ուսումնական կետի ղեկավարի պարտականությունները:
Վարժադաշտում ուսումնական եռուզեռ է: Հետևակի մարտական մեքենաների անձնակազմները հերթով դիպուկ կրակով խոցում են շարժվող և անշարժ թիրախները:
-Քիչ առաջ իմ անձնակազմը անվրեպ խոցեց շարժվող և անշարժ բոլոր թիրախները՝ գերազանց կատարելով առաջադրված խնդիրները: Շարունակելու ենք ամենայն լրջությամբ ու պատասխանատվությամբ մոտենալ ուսումնական գործընթացին,- վստահեցնում է ՀՄՄ-ի հրամանատար, ժամկետային զինծառայող Գագիկ Տոնոյանը:
Ֆիզիկականից և մասնագիտականից ոչ պակաս կարևոր է նաև հոգեբանական պատրաստությունը, ինչը կուրսանտների ուսումնական առօրյայի կարևոր բաղադրիչներից է: Մենք եղանք հոգեբանական արգելագոտիների հաղթահարման ուսումնական կետում, որը կահավորված էր մարտական իրավիճակին առավելագույնս մոտ և մարտական խնդիրները կատարելիս հավանական հոգեբանական խոչընդոտները հաշվի առնելով:
Կուրսանտներն ընդամենը երեք ամիս է, ինչ համալրել են զինված ուժերի շարքերը, բայց լսարանային պայմաններում հատուկ վարժասարքերի, վարժադաշտում անցկացվող ամենշաբաթյա գործնական պարապմունքների միջոցով արդեն հասցրել են ձեռք բերել անհրաժեշտ փորձառություն:
Վարժադաշտում ուսումնական ակտիվ եռուզեռը շարունակվում է. ՀՄՄ-ի անձնակազմը խոցում է ուսումնական թիրախները, շտկում թերացումները ՝ ավելի բարձր արդյունքի հասնելու համար։
ՀՈՎՀԱՆՆԵՍ ՊԱՌԱՇՅԱՆ
Լուսանկարները՝ ՖԵԼԻՔՍ ՇԱԽՏՈՅԱՆԻ
