Language:

  • Հայերեն
  • Русский
  • English

ՁԵՐ ՍԽՐԱՆՔՆ ԱՆՄԱՀ Է, ՁԵՐ ԱՆՈՒՆԸ՝ ՄԵՐ ՍՐՏԵՐՈՒՄ



ՁԵՐ ՍԽՐԱՆՔՆ ԱՆՄԱՀ Է, ՁԵՐ ԱՆՈՒՆԸ՝ ՄԵՐ ՍՐՏԵՐՈՒՄ44-օրյա պատերազմը չշրջանցեց նաև Արագածոտնի մարզի Հնաբերդ  գյուղը, որն  ուրախացավ  յուրաքանչյուր հերոսի վերադարձով և շատ տխրեց, ցավից կծկվեց յուրաքանչյուրի  նահատակությամբ:

Աբրահամ և Մովսես Կարապետյան եղբայրներ, Հմայակ և Ավետիս  Ավետիսյաններ՝ հայր և որդի, Նվեր  Մանուկյան. ահա  այն  հինգ հերոսները, որոնք  չերկնչեցին, կռվեցին  ու  անմահացան:

Ի  հիշատակ  հերոսների` Հնաբերդ գյուղի Հայրենական մեծ պատերազմին նվիրված հուշարձանի տարածքում մի խումբ երիտասարդներ Գոռ Հունանյանի նախաձեռնությամբ  հուշաքար  կանգնեցրին: Եվ  սա  դեռ  ամենը չէ: Ծնունդով հնաբերդցի ճանաչված բանաստեղծ, մանկագիր Երվանդ Պետրոսյանի  անվան  միջնակարգ  դպրոցի  դասասենյակներից մեկում ստեղծվեց «Փառքի անկյուն»: Անկյուն, որտեղ տեղ են գտել մերօրյա հերոսների լուսանկարները, մեդալները, պատվոգրերը  և  անձնական  իրերը:

Հուշաքարի  և  «Փառքի  անկյուն»-ի  օծման արարողությունը  կատարեց Ապարանի Սուրբ խաչ եկեղեցու  հոգևոր  հովիվ  Տեր  Սարգիս  քահանա Սարգսյանը: Օծման արարողությանը  ներկա  էին դպրոցի  կոլեկտիվը, զոհվածների հարազատները, համայնքի ներկայացուցիչներ, հյուրեր: Արարողությունից հետո  դպրոցի 10-12-րդ  դասարանների աշակերտների  մասնակցությամբ  կազմակերպվեց  հիշատակի  ցերեկույթ:

Աշակերտներն  ասմունքում էին, բայց  դա  սոսկ  ասմունք  չէր, այլ  սրտի  խոսք: Նրանց խոսքն ուղեկցվում էր երաժշտությամբ: Դահլիճում քար  լռություն  էր  տիրում: Բոլորի  աչքերում  արցունք  էր  լճացել…

Վազգեն  Սարգսյանի  անվան համալսարանի  դասախոս,  պատերազմի  մասնակից, հնաբերդցի Մարգար Մանուկյանը իր ելույթում խոսելով  համագյուղացիների  քաջության  և  արիության  մասին, նաև կարևորեց դպրոց-բանակ կապը և նշեց, որ ժողովրդի գոյության հիմքերից  մեկն  էլ  դպրոցն է, որը կոչված է՝ «սանի մարմինը  դարձնել  ապառաժ, կամքը` վահան, միտքը` թուր»:

-Դպրոցն  իր   արժանին  է  մատուցում  և  շարունակելու  է  մատուցել  զոհված   հերոսներին,- նշեց  դպրոցի  տնօրեն  Նելսիդա Նիկողոսյանը, որը կրթօջախի անունից պատվոգրեր հանձնեց վերջին երկու ուսումնական տարիների այն շրջանավարտներին, որոնք որպես ժամկետայիններ  մասնակցել  են 2020 թվականի  պատերազմին:

Փա՛ռք  այն  զինվորներին, որոնք  դարձան  գիտակցված  անմահության  ճամփորդներ:

Փա՛ռք այն զինվորներին, որոնք իրենց կյանքը տվեցին հանուն  մեր  կյանքի:

 

ԿԱՐՄԵՆ ՆԵՐՍԻՍՅԱՆ

Լուսանկարը՝ ԱՐՏԱԿ ՄԱՆՈՒԿՅԱՆԻ

Խորագիր՝ #39 (1410) 6.10.2021 – 12.10.2021, Բանակ և հասարակություն


07/10/2021