ՓԱՌՔԻ ԱՐԱՀԵՏՈՎ՝ ԴԵՊԻ ՀԱՎԵՐԺՈՒԹՅՈՒՆ…
Օրերս Երեւանի Միսաք Մեծարենցի անվան թիվ 146 հիմնական դպրոցում հուշ-ցերեկույթ էր՝ նվիրված կրթօջախի սաներին՝ Վահագն Էլոյանին, Ազատ Գեւորգյանին, Կարեն Մուրադյանին. հայրենի եզերքի պաշտպանության համար տղաները նվիրաբերեցին ամենաթանկը՝ կյանքը…
-Նրանք կատարեցին իրենց պարտքը, իսկ մենք դեռ պարտք ունենք ու այդ պարտքը պետք է տանք ապրելով, շենացնելով, հզորացնելով ու ծաղկեցնելով մեր երկիրը,- իր խոսքում նշեց դպրոցի տնօրեն Մարիետա Դավթյանը:- Մեր պարտքն է նաեւ հիշել ու մեծարել մեր քաջերին, վառ պահել նրանց հիշատակը:
Հուշ-ցերեկույթին ներկա էր նաեւ գեներալ-լեյտենանտ Մուրազ Սարգսյանը: Վերջինս կարեւորեց նմանօրինակ միջոցառումների կազմակերպումը՝ համարելով հայրենասիրական, ուսուցանող դաս մատաղ սերնդի համար.
-Այսօրվա աշակերտը վաղվա զինվորն է, եւ հայրենասեր ու հայրենատեր ոգով դաստիարակության մեջ է հայ ազգի հարատեւումը: Միայն կռվի դաշտում չէ, որ հաղթում եւ հերոսանում են. ամեն մեկն իր ասպարեզում զինվորի նվիրումով, զինվորի պատասխանատվությամբ ու պատվախնդրությամբ պետք է ծառայի հայրենիքին:
Միջոցառման ավարտից հետո ներկաները այցելեցին «Եռաբլուր» զինվորական պանթեոն՝ հարգանքի տուրք մատուցելու հանուն հայրենիքի անմահացածներին:
Առաջիկայում դպրոցի երեք դասասենյակներ կանվանակոչվեն խիզախ հայորդիների անուններով:
ԱԼԻՍ ԱԼԱՎԵՐԴՅԱՆ
ԼՈՒՍ.՝ ԱՐԵԳ ՎԱՐԴԱՆՅԱՆԻ
Խորագիր՝ #24 (1395) 23.06.2021 - 29.06.2021, Բանակ և հասարակություն
