Շիրակի մարզի դպրոցականների նամակները առաջնագծում ծառայող զինվորներին

 

Բարև, իմ քաջ զինվոր։ Գրում եմ՝ հույս ունենալով, որ մի օր ժամանակ կգտնես, նամակս կկարդաս, ու խոսքերս փոքր-ինչ կջերմացնեն քեզ։

Ես գիտեմ՝ քեզ համար հեշտ չէ. հեռու ընտանիքից, հարազատներից, ընկերներից` դու պաշտպանում ես մեր թանկ հողը: Բայց և սահմանին դու գիտակցում ես, որ թիկունքում քեզ հարազատ մարդիկ են, և դա քեզ ավելի է հզորացնում։

Հա՛յ զինվոր, ես քո օրինակով եմ հասկանում, թե ինչ է իրական սերն առ հայրենիք։

Ելենա Հովհաննիսյան

 Կամոյի միջն. դպրոց

 11-րդ դասարան

 

♦♦♦

Բարև, իմ խիզախ ու արիասիրտ զինվոր եղբայրներ, որ պաշտպանում եք մեր սրբազան հայրենիքը: Դուք մեր հպարտությունն եք, մեր խաղաղ օրվա երաշխավորը:

Պապիկս Արցախյան պատերազմի մասնակից է, և ես հպարտ եմ մեր Հաղթանակում նրա ունեցած ավանդով: Հպարտ եմ յուրաքանչյուր հայրենյաց պաշտպանով: Շնորհակալ եմ, որ ամուր եւ անառիկ եք պահում մեր երկրի սահմանները: Մեր քաջ պաշտպաններ, բոլորիդ խաղաղ ծառայություն եմ մաղթում եւ բարի վերադարձ:

 

Սուսաննա Ղազարյան

 Գյումրի, Օյունջյանի անվան թիվ 21 դպրոց

 5-րդ դասարան

 

♦♦♦

Զինվո՛ր, գիտեմ, որ քեզ համար առավել կարևոր առաքելություն չկա, քան հայրենիքի պաշտպանությունը։ Բոլորս հպարտանում ենք քեզանով: Դու հայ ազգի պաշտպանն ու պահապանն ես։ Ուզում եմ, որ բարի սկսվի ու բարի ավարտվի քո օրը, քեզ խաղաղ և անամպ երկինք։

Շնորհակալ եմ այն մայրերին, որոնք քեզ նման հայրենիքին նվիրված հերոս զավակներ են ծնել։

 

Աստղիկ Ղազարյան

Կամոյի միջն. դպրոց

8-րդ դասարան

 

♦♦♦

Բարև, իմ հերոս զինվոր, իմ ավագ եղբայր:

Ես պապիկիս անունն եմ կրում, նա Արցախյան պատերազմի մասնակից է, բազմաթիվ մեդալներ ունի: Պապիկս ինձ պատմել է այն դժվարին օրերի, իրենց հաղթանակների մասին: Ես չեմ ուզում պատերազմ լինի, բայց, եթե հարկ լինի, ես էլ կկռվեմ թշնամու դեմ, որ արժանի լինեմ պապիկիս անվանը…

Ես պատանի ծանրամարտիկ եմ, բազմաթիվ մրցաշարերում եմ հաղթել: Խոստանում եմ՝ երբ շատ հայտնի, ճանաչված մարզիկ դառնամ, իմ մեծ հաղթանակներից մեկը քեզ եմ նվիրելու:

 

Գրիգոր Ղազարյան

 Գյումրի, Օյունջյանի անվան թիվ 21 դպրոց

6-րդ դասարան

 

♦♦♦

Բարև, իմ մեծ եղբայր:

Ես անպատմելի հպարտությամբ եմ քեզ այդպես դիմում։ Սրտիս արագացած զարկերով եմ գրում այս նամակը և ուզում եմ երախտագիտությունս հայտնել քեզ: Որքան կարեւոր ու պատասխանատու գործ են մեր բոլոր զինվորները կատարում հիմա սահմանին կանգնած։ Ձեր շնորհիվ է խաղաղ ու անհոգ անցնում իմ մանկությունը: Շնորհակալ եմ, իմ եղբայրներ։

Էվելինա Մխիթարյան

Գյումրի,  թիվ 23 դպրոց

 6-րդ  դասարան