ՆՐԱՆՔ ԸՆՏՐԵԼ ԵՆ «ՊԱՏԻՎ ՈՒՆԵՄ» ԾՐԱԳԻՐԸ

ՄՈՒՇԵՂ ՄԵՍՐՈՊՅԱՆ

ք. Եղեգնաձոր, Վայոց ձորի մարզ

Սովորում եմ Ագրարային համալսարանում: Այս ծրագիրը ապագա ունեցող ծրագիր է: Գուցե ժամանակի ընթացքում որոշ բաներ փոխվեն, բայց որ հասարակությունն այն ընդունել է, դա միանշանակ է: «Պատիվ ունեմ»-ի որոշ դրույթներ ինձ դուր եկան, թեև, իմ խորին համոզմամբ, երկու տարվա ծառայությունը բավարար չեմ համարում: Տրամադրված եմ հետագայում պայմանագիրս երկարաձգել:

ՀԱՐՈՒԹՅՈՒՆ ՄԵՍՐՈՊՅԱՆ

Ք. Ստեփանակերտ

Սովորում եմ Մխիթար Հերացու անվան Բժշկական համալսարանի երկրորդ կուրսում: Ուսումս վերջացնելուց հետո բանակում կծառայեմ իմ մասնագիտությամբ և վստահ եմ, որ օգտակար կլինեմ իմ երկրի զինված ուժերին: «Պատիվ ունեմ» ծրագրի երիտասարդներին խրախուսելու դրույթները անշուշտ ոգևորիչ են: Ես էլ զինվորական կյանքին, բանակային անցուդարձին բավականաչափ ծանոթ եմ, ուստի որոշեցի ծառայել ըստ «Պատիվ ունեմ» ծրագրի: Կարևորը` խաղաղություն թող լինի: