Language:

  • Հայերեն
  • Русский
  • English

ՀՀ ԶՈՒ ՀՈԳԵՎՈՐ ԱՌԱՋՆՈՐԴ ՎՐԹԱՆԵՍ ԵՊԻՍԿՈՊՈՍ ԱԲՐԱՀԱՄՅԱՆԻ ԱՄԱՆՈՐՅԱ ՇՆՈՐՀԱՎՈՐԱԿԱՆ ՈՒՂԵՐՁԸ



ՀՀ ԶՈՒ ՀՈԳԵՎՈՐ ԱՌԱՋՆՈՐԴ ՎՐԹԱՆԵՍ ԵՊԻՍԿՈՊՈՍ ԱԲՐԱՀԱՄՅԱՆԻ ԱՄԱՆՈՐՅԱ ՇՆՈՐՀԱՎՈՐԱԿԱՆ ՈՒՂԵՐՁԸ«Քրիստոս Ծնաւ եւ Յայտնեցաւ

Մեզ եւ Ձեզ Մեծ Աւետիս»

Սիրելի՛ սպաներ և զինվորներ Հայոց հաղթական  բանակի

ՀՀ ԶՈՒ հոգևորականաց ողջ դասի անունից մեր շնորհավորանքներն ու օրհնությունն ենք բերում Ձեզ Հիսուս Քրիստոսի Հրաշափառ Ծննդյամբ իմաստավորվող  տարեմուտի  առթիվ:

Մի  սուրբ գիշեր բացվեցին Երկնքի ողորմության դռները, և իմանալի լույսը հորդառատ գետի պես հեղվեց երկիր ու ողողեց աստվածարար երկրագունդը: Կատարվեց անճառելի մի իրադարձություն, իրականացավ անմեկնելի աստվածային տնօրենություն՝  մեծ և սքանչելի խորհուրդ. Աստված մարդացավ: Քրիստոսի Սուրբ Ծննդյան խորհրդով օծուն նոր տարին կրկին հուշում է մեզ 2019 տարի առաջ Բեթղեհեմ քաղաքում կատարված մեծախորհուրդ իրադարձությունը: Մեր հոգու  բաց աչքերով տեսնենք Աստծո ներկայությունը մեր կողքին և նախախնամական տնօրինությունը Տիրոջ, քանի որ արդար հոգիները փնտրում և մտնում են Քրիստոսի Լույս Ծնունդի մեջ: Մտնենք Քրիստոսի ծննդյան լույս խորհրդի մեջ, և կծաղկի  մեր անկախ Հայաստանը և Հայոց Ազգային բանակը:

Նոր տարվա սկզբին, երբ կանգնած ենք հին և նոր տարիները շաղկապող ժամանակի մեջ, պիտի վերագնահատենք և վերարժևորենք կյանքի այն ուղին, որով անցել ենք, և որը մեզ դեռ սպասում է: Մարդու համար կարևորը ոչ թէ ժամանակի փոփոխությունն է կյանքում, այլ կյանքի և մարդու փոփոխությունը ժամանակի մեջ, քանզի տարին նորանում է մարդու նոր հույսերով, նոր խոհերով և նոր գործերով. «Մինչդեռ ժամանակ ունենք, բարիք գործենք ամենքին» (Գաղ. 6:10): Ուստի մեր կոչումն ու պարտականությունն է գալիք տարում ընձեռված ժամանակը լցնել ազնիվ գործերով և նվիրյալ ծառայությամբ` հույսը վերածելով կյանքի, գործի, իրականության:

Մանուկ Հիսուսի հովանին ու օրհնությունն ենք հայցում Հայաստանի Հանրապետության և նրա անվտանգության երաշխիք Բանակի` հայոց զորաց և զորականաց համար՝ ավետելով.

«Քրիստոս Ծնաւ եւ Յայտնեցաւ

Օրհնեալ է Հայտնությունը Քրիստոսի»:

Խորագիր՝ #24 (1271) 14.12.2018 - 25.12.2018, Հոգևոր-մշակութային, Ուշադրության կենտրոնում


30/12/2018