Պաշտպանության բանակի «Տիգրանակերտ» զորավարժարանում խաղարկվեց մարտական հրաձգությամբ ցուցադրական գումարտակային մարտավարական զորավարժություն: Հրամանատարական հավաքների կարևորագույն ուսումնամարտական միջոցառումը անցկացվեց հայկական երկու հանրապետությունների ռազմական համագործակցության շրջանակներում: Զորավարժության եզրափակիչ փուլին հետևում էին ՊԲ հրամանատար, գեներալ-լեյտենանտ Լևոն Մնացականյանը, ԶՈՒ մարտական պատրաստության վարչության պետ-գլխավոր շտաբի պետի տեղակալ, գեներալ-մայոր Անդրանիկ Մակարյանը, բարձրաստիճան հրամկազմի ներկայացուցիչներ:

Նախ՝ ծավալված ցուցադրական կետերում անդրադարձ եղավ գումարտակային մարտավարական զորավարժության ժամանակ մշակվող մարտական փաստաթղթերին ու հրամկազմի պարտականություններին: Զորամասերի հրամանատարներին ու նրանց տեղակալներին ներկայացվեցին  ՊԲ-ում ներդրված նորագույն սարքավորումներն ու մի շարք նոր զինատեսակներ՝ նախատեսված հետախուզության վարման ու տեսադիտարկման իրականացման համար: Նշվեց, որ ներկայացված նորամուծությունները կիրառվում են բարձր արդյունավետությամբ: Զորավարժության ընթացքում առաջին անգամ  մարտականին առավելագույնս մոտեցված պայմաններում կիրառվեցին նաև նոր հարվածային անօդաչու թռչող սարքեր, որոնք նախքան մարտավարական զորախաղերում կիրառվելը անցել են բավականին երկարատև փորձաշրջան և լիովին ապացուցել իրենց արդյունավետությունը:

…Մարտական հրաձգության փուլի խաղարկման ժամանակ մեր ուժերի առաջին դիրք մխրճված պայմանական հակառակորդի առաջխաղացումը կասեցնելու նպատակով յուրային ուժերը զբաղեցրին կրակային բնագիծ, ապա անցան հակահարձակման: Զգալի կորուստներ պատճառելով հակառակորդին՝ առաջնագիծը վերականգնվեց:  Պայմանական մարտի ընթացքում իրականացվեց անընդհատ ղեկավարում, կազմակերպվեց արդյունավետ փոխգործակցություն, անձնակազմը գործեց գրագետ:

Գումարտակային մարտավարական զորավարժության արդյունքում կատարելագործվեցին մասնակից ստորաբաժանումների հրամկազմի գիտելիքներն ու գործնական ունակությունները որոշումների ընդունման, տվյալների նախապատրաստման և հաշվարկների կատարման, ինչպես նաև փոխգործակցության անընդհատ ապահովման և ստորաբաժանումների ղեկավարման գործում: Կրտսեր հրամանատարները հնարավորություն ստացան զարգացնել որոշումներ ընդունելու և ենթականերին խնդիրներ առաջադրելու կարողությունները: Անձնակազմը ձեռք բերեց բարոյակամային ու մարտական բարձր որակներ: Զորավարժության արդյունքները բարձր գնահատեց գեներալ-մայոր Անդրանիկ Մակարյանը:

Գումարտակային մարտավարական զորավարժությունը հերթական անգամ փաստեց, որ վերջին տարիներին ՊԲ-ում իրականացված եւ դեռ  շարունակվող բարեփոխումները, ռազմատեխնիկական համալրումներն ու արդիականացման համալիր գործընթացներն արդեն շոշափելի դրական արդյունքներ են տալիս:

ԱՐՄԱՆ ԱՎԱՆԵՍՅԱՆ