ԻՍՐԱՅԵԼԸ «ԲԱՐԲԱՐՈՍԱՅԻՆ» ԿՊԱՏԱՍԽԱՆԻ ՀԱՅԵՐԻՆ ԵՎ ՔՐԴԵՐԻՆ ՕԳՆԵԼՈՎ
Իսրայելը Թուրքիայի նկատմամբ պատասխան քայլերի ծրագիր է մշակել վերջինիս կողմից դիվանագիտական «հարձակմանն» ի պատասխան: Մասնավորապես, Իսրայելը պատրաստ է Թուրքիայի ոչ բարեկամական քաղաքականությանն արձագանքել քրդերին և հայերին օգնություն տրամադրելով:
Իսրայելի արտաքին գործերի նախարար Ավիգդոր Լիբերմանը հայտարարել է. Էրդողանը պետք է հասկանա, որ հակաիսրայելական գործողություններն անպատասխան չեն մնա:
Այս տեղեկատվությունը հայտնվել է Թուրքիայի ռազմածովային նոր ռազմավարության` «Բարբարոսսա» օպերացիա անվանմամբ, հրապարակումից հետո:
Իսրայելը նախատեսում է ամրապնդել կապերը ԱՄՆ Կոնգրեսում գործող հայկական լոբբիի հետ` հատկապես Հայոց ցեղասպանության ճանաչմանը նպաստելու նպատակով: Լիբերմանը համապատասխան առաջարկներ կանի հայկական լոբբիի ղեկավարներին սեպտեմբերին ԱՄՆ կատարելիք հերթական այցի ժամանակ:
Իսրայելը կարող է կապեր հաստատել նաև Քուրդիստանի աշխատավորական կուսակցության հետ, որը Թուրքիայում ճանաչվել է ահաբեկչական կազմակերպություն, և աջակցություն տրամադրել բոլոր հնարավոր ոլորտներում:
Երկու դեպքում էլ Իսրայելի պատասխան գործողությունները մեծ արդյունավետություն կունենան, քանի որ և´ հայկական, և´ քրդական հարցերը Թուրքիայի ցավոտ կողմն են:
Խորագիր՝ Նորություններ, Ռազմաքաղաքական, Տարածաշրջան
