Հայերեն | На русском | In English
Մեր եռագույնը բարձրացնելու եւ Հայոց հիմնը մոլորակով մեկ հնչեցնելու պատմական եւ երջանիկ բազում պահեր է մեզ պարգեւել Օլիմպիական խաղերի չեմպիոն, աշխարհի եռակի չեմպիոն, ըմբշամարտիկ Արթուր Ալեքսանյանը: Օրերս Գյումրիում հանդիպեցի նրան, բայց հանդիպման առիթը ոչ թե մարզական ստուգատեսում աշխարհահռչակ մարզիկի հերթական նվաճումն էր, այլ նոր-նոր ավարտված զորակոչը:
-Արթուր, ավարտվեց հերթական զորակոչը: Հատկապես քո ծննդավայր Գյումրիում զորակոչը միշտ էլ համաժողովրդական ըմբռնում է ունեցել, անգամ 90-ականների սկզբներին, երբ նոր-նոր էր կազմավորվում հայոց բանակը: Իսկ զինվորական կոմիսարի խոսքից էլ հասկացա, որ քո հերթական այս այցը ամենևին էլ անակնկալ չէր իրենց համար , քանի որ դու զորակոչի օրերին հաճախ ես լինում զինկոմիսարիատում: Մի խոսքով՝ քաջատեղյակ ես զորակոչային անցուդարձին:
-Համոզված եմ, որ աշխարհում ոչ մի հայ անհաղորդ, անտարբեր չէ զորակոչին և ընդհանրապես՝ բանակի խնդիրներին: Երբ ժամանակս ներում է, ամեն կերպ փորձում եմ ինչ-որ բանով աջակցել, թեկուզ իմ ներկայությամբ օգտակար լինել : Երբ իմանում եմ, որ զինկոմիսարիատը ինչ-որ միջոցառում է կազմակերպել, եթե քսան րոպե էլ ժամանակ ունենամ, անպայման ներկա եմ գտնվում: Բանակը գյումրեցու համար սրբություն սրբոցի պես մի բան է: Բանակի հետ կապված ամեն ինչին գյումրեցին պատվախնդրորեն է մոտենում:
-Մի առիթով դու ասել ես, որ քո հաղթանակները միայն քոնը չեն՝ քո Երկրինն են, քո ժողովրդինն են…
– Նաեւ՝ ազգին ծառայող, ազգի պաշտպան զինվորինն են:
-Ինչպես մարզիկը, այնպես էլ զինվորը, պետք է հոգեբանորեն ուժեղ լինի, ունենա հոգեբանական պատրաստվածության բարձր աստիճան: Այդպե՞ս չես կարծում:
-Ոչ միայն հոգեբանական, այլև ֆիզիկական ու մարտական պատրաստվածության բարձր աստիճան. կատարյալ վիճակն է բերում հաղթանակի:
-Արթուր, չես կարծում, որ բանակը ուժեղ տղերքի տեղ է:
-Հաստատ: Միշտ էլ այդպես է եղել: Հատկապես՝ մեր բանակը, որը մեր սահմանները թշնամու ոտնձգություններից պաշտպանելու խնդիր ունի, հոգով ուժեղ ու սրտոտ տղերքի տեղ է: Էն տղերքը, ովքեր ծառայում են բանակում, նրանք ամենահայրենասեր ու քաջ տղերքն են: Ապրիլյան քառօրյան ցույց տվեց, թե ինչ առյուծասիրտ ու անվախ տղերք են սահմանին կանգնած: Այսօր բանակ գնացող պատանիներն էլ, ես համոզված եմ, ապրիլյան հերոսների նման քաջասիրտ տղերք են:
ՍԱՄՎԵԼ ՀԱՐՈՒԹՅՈՒՆՅԱՆ
