Դիլիջան քաղաք տեղափոխված ամբողջովին նոր, միջազգային ամենաբարձր չափանիշներին համապատասխանող Մոնթե Մելքոնյանի անվան ռազմամարզական վարժարանի սաների համար նոյեմբերի 28-ի առօրյան հագեցած էր:  ՀՀ ՊՆ 3-րդ բանակային զորամիավորման և վարժարանի տնօրինության նախաձեռնությամբ անցկացվեց բաց դաս: Տարբեր ուսումնական կետերում ստորաբաժանման  զինծառայողները ցուցադրեցին իրենց մասնագիտական հմտություններն ու հետախուզական զինանոցում առկա զենքերն ու սարքավորումները. անօդաչու թռչող սարք, ջերմատեսիլ և գիշերային տեսանելիության սարքեր, ականազերծման համակարգեր, կապի միջոցներ: Զինծառայողները հանգամանորեն պարզաբանեցին  ցուցադրվող զենքի, զինամթերքի, սարքավորումների հնարավորություններն ու օգտագործման ձևերը:

Ամենավերջում ամենահետաքրքիրն էր` հետախույզները վնասազերծեցին հակառակորդի պահակակետը, ցուցադրեցին թշնամու գերեվարման իրենց հմտությունները:

Մոնթե Մելքոնյանի անվան վարժարանում կազմակերպված բաց դասին ներկա էին ՀՀ ԶՈՒ գլխավոր շտաբի պետի առաջին տեղակալ, գեներալ-մայոր Օնիկ Գասպարյանը, 3-րդ բանակային զորամիավորման շտաբի պետ, գնդապետ Արթուր Սարգսյանը:

Վարժարանի սաների հետ հանդիպման ընթացքում գեներալ-մայոր Օ.Գասպարյանը նշեց, որ զինված ուժերն ապահովված են անհրաժեշտ միջոցներով՝ հակառակորդին ջախջախելու և ցանկացած ոտնձգության արժանի հակահարված տալու համար։ Վարժարանի սաներն իրենց հետաքրքրող հարցերն ուղղեցին գեներալ-մայորին:

Բանակային զորամիավորման թղթակցական կետ