ԱՆԿԱԽՈՒԹՅԱՆ ՕՐՎԱՆ ՆՎԻՐՎԱԾ ՄԻՋՈՑԱՌՈՒՄ ԳՈՐԻՍՈՒՄ

Սեպտեմբերի 21-ին Գորիսի  Մեծ Հայրենականի և Արցախյան պատերազմի զոհերի հիշատակը հավերժացնող հուշահամալիրում տեղի ունեցավ միջոցառում՝ նվիրված ՀՀ Անկախության 26-րդ տարեդարձին:

Մինչ այդ, քաղաքի Սուրբ Գրիգոր Լուսավորիչ եկեղեցում միջոցառման մասնակիցների համար տրվել էր ժամերգություն, կատարվել մոմավառություն:

Միջոցառմանը մասնակցում էին Գորիսի քաղաքապետի պաշտոնակատար Առուշ Առուշանյանը, համայնքապետարանի ներկայացուցիչներ, 1-ին զորամիավորման շտաբի պետ – հրամանատարի տեղակալ, գնդապետ Ալեքսանդր Ցականյանը, վարչակազմի և ենթակա զորամասերի սպաներ, Գորիսի ԵԿՄ տարածքային բաժանմունքի  նախագահ, փոխգնդապետ Սուրեն Բաղդասարյանը, Արցախյան պատերազմի ազատամարտիկ-վետերաններ, մեծաթիվ գորիսեցիներ, հյուրեր, դպրոցականներ:

Միջոցառման մասնակիցները ծաղիկներ  խոնարհեցին Մեծ Հայրենականում և Արցախյան հերոսամարտում իրենց կյանքը նվիրաբերած գորիսցի քաջորդիների հիշատակը հավերժացնող հուշարձաններին:

Օրհնության, շնորհավորանքի խոսք ասաց  զորամիավորման հոգևոր սպասավոր Հրայր Սարկավագ Լալայանը:

Սյունյաց թեմի հոգևոր հովիվ Տեր Ահարոն քահանա Մելքումյանն աղոթք հնչեցրեց հայրենիքի խաղաղության,  արարման և ծաղկման, ամուր հավատքի համար՝  հայ ժողովրդին և Հայոց բանակի զինծառայողներին մաղթելով քաջառողջություն, բարեկեցություն, պատվավոր ծառայություն հայրենիքին, հարատևություն:

Միաձայն հնչեց տերունական աղոթքը:

Համայնքապետի տեղակալ Մենուա Հովսեփյանը կարդաց Գորիսի համայնքապետի պաշտոնակատար Առուշ Առուշանյանի շնորհավորական ուղերձը՝ ուղղված Գորիսի ազգաբնակչությանը, տարածաշրջանում տեղակայված զորամիավորման զինծառայողներին:

Այդուհետ, գնդապետ Ալեքսանդր Ցականյանն ընթերցեց 1-ին զորամիավորման հրամանատար, գեներալ-մայոր Տիգրան Փարվանյանի շնորհավորական ուղերձը:

Ուղերձում մասնավորապես ասված է.

«Անկախության ճանապարհին մեզ պատուհասած փորձությունները ցույց տվեցին, որ մենք պարտավոր ենք հավատալ և վստահել միայն ինքներս մեզ, մեր ուժին, մեր ոգեղեն և արարչական ուժին:

Բարեբախտաբար, հայոց պետականության ստեղծման իրողությանը անքակտելի կապված է Հայոց բանակի պատմությունը:

Մեր երկրի անկախությունը նշանավորվեց Հայոց բանակի կազմավորմամբ, հաղթական պատերազմում և հետագա պատերազմական տարիներին նրա կայացմամբ և հզորացմամբ:

Հայոց բանակն ու Անկախությունը, կարելի է ասել, հայ ժողովրդի դարավոր երազանքի անդրանիկ զավակներն էին, որոնք ստեղծվեցին և կայացան մեր ժողովրդի մեծագույն զոհողությունների, մեր մայրերի խնկարկելի համբերության, նրանց որդիների սխրանքների ու կյանքի գնով, ի վերջո, հայ զինվորի ու սպայի անձնվիրության, կամքի, բանակաշինությանն ուղղված նրանց օրնիբուն, անդադար աշխատանքի շնորհիվ:

Անկախության ծննդից ի վեր հայ ժողովրդի կյանքում միանգամայն անանջատելի են Ազգ, Բանակ և Պետություն արժեքները:

Մեկ անգամ ևս շնորհավոր հայ ժողովրդին՝ Անկախության օրվա առթիվ:

Թող մեր ժողովրդի հազարամյա երթը անխափան և հարատև լինի:

Պատմական առաքելությամբ մեզ վիճակված ազատության ու անկախության հաղթական դրոշն ամուր պահենք, բարձր պատասխանատվությամբ և պատվով, հավատով և հույսով նայենք ապագային, միասնական դիմագրավենք հնարավոր բոլոր մարտահրավերները, միակամ լինենք ազգային վեհ նպատակների իրականացման գործում»:

Անկախության օրվա առթիվ N զորամասի լավագույն զինծառայողները հրամանատարի կողմից խրախուսվեցին պատվոգրերով:

Զինծառայողների կողմից ցուցադրվեցին հետախուզական, ցուցադրական հնարքներ, մարտավարական վարժություններ:

Միջոցառման ավարտից հետո դեռ երկար ժամանակ տիրում էր տոնական օրվա գեղեցիկ տրամադրությունն ու զորամասի և մշակույթի կենտրոնի նվագախմբերի հնչեցրած  երաժշտությունը, մարդիկ շնորհավորում էին միմյանց, բարեմաղթանքներ հղում:

1-ի զորամիավորման լրատվական ծառայություն