Language:

  • Հայերեն
  • Русский
  • English

«ԱՐԻ ՏՈՒՆ»



«ԱՐԻ ՏՈՒՆ»Օրերս 5-րդ զորամիավորման Սպարապետ Վազգեն Սարգսյանի անվան զորամասում տիրում էր տոնական մթնոլորտ. պատճառը «Արի տուն» ծրագրով 145 սփյուռքահայ պատանիների և աղջիկների այցելությունն էր զորամաս:

Զորամասի հրամանատար, գնդապետ Կ. Սերոբյանը նշեց, որ նմանատիպ այցելությունները նոր լիցք են հաղորդում զինծառայողներին, ինչպես նաև նպաստում են բանակհասարակություն կապի ամրապնդմանը, որ անչափ կարևոր է ծառայության մեջ գտնվող զինծառայողների համար: Տեսնելով հայ երիտասարդի, պատանու ոգևորությունը՝ յուրաքանչյուրն է՛լ ավելի մեծ հավատով ու եռանդով է կատարում իր պարտականությունները:

Սփյուռքահայ պատանիները և աղջիկները, զորամասի հրամանատարի ԱՀՏԱԳ տեղակալի պաշտոնակատար, մայոր Մ. Իսպիրյանի և ֆիզիկական պատրաստության պետ, մայոր Արծրուն Հարությունյանի ղեկավարությամբ, անցան զորամասի տարածքում բացազատված ուսումնական կետերով, որտեղ պարտադիր ժամկետային զինծառայողները և սպաները մանրամասնորեն ներկայացրին հրաձգային զենքերի, ականանետների, ՀՄՄների և տանկերի մարտավարատեխնիկական բնութագրերը:

Ուսումնական կետերում հրաձգային զենքերին ծանոթանալուց հետո սփյուռքահայ երիտասարդները հետաքրքրվեցին պարտադիր ժամկետային զինծառայողների կենցաղին, զորանոցային, սանիտարահիգիենիկ պայմաններին. կացարաններում տիրում էր մաքրություն, մահճակալները հարդարված էին ամենայն բծախնդրությամբ:

Շրջայցից հետո սփյուռքահայ պատանիներն ու աղջիկները ցանկություն հայտնեցին համտեսելու զինվորական ճաշերը. կազմակերպվեց հյուրասիրություն զորամասի ճաշարանում, որին մասնակցեցին նաև զինվորներն ու սպաները: Միակամ բոլորը պնդեցին, որ ճաշատեսակները իրենց համային որակներով չեն զիջում մայրիկների եփածներին:

Ավարտին մայոր Մ. Իսպիրյանը մեկ անգամ ևս շնորակալություն հայտնեց այցելության համար, շեշտեց, որ այսպիսի շփումները ոգևորություն են հաղորդում բոլորին` դրանով իսկ նպաստելով ազգբանակ հայեցակարգի կայացմանը և մեր ազգի տարբեր հատվածների միասնականության ամրապնդմանը:

5-ՐԴ ԶՈՐԱՄԻԱՎՈՐՄԱՆ ԹՂԹԱԿՑԱԿԱՆ ԿԵՏ 

Խորագիր՝ #29 (1200) 26.07.2017 – 01.08. 2017, Բանակ և հասարակություն


26/07/2017