Language:

  • Հայերեն
  • Русский
  • English

ՀԱՅՐԵՆԱՆՎԵՐ ԳՈՐԾԸ ՇԱՐՈՒՆԱԿՎՈՒՄ Է



Սա Հայաստանն է, եւ վե՛րջ…

Լեոնիդ Ազգալդյան

 

ՀԱՅՐԵՆԱՆՎԵՐ ԳՈՐԾԸ ՇԱՐՈՒՆԱԿՎՈՒՄ ԷՔաշաթաղի շրջանի կազմավորման առաջին օրերից ԵՊՀ արեւելագիտության ֆակուլտետի դեկան Գուրգեն Մելիքյանն ստեղծեց «Գուրգեն Մելիքյանը՝ Քաշաթաղի բազմազավակ ընտանիքներին» բարեգործական հիմնադրամը եւ սկսեց օժանդակել քաշաթաղցիներին: Այս տարիների ընթացքում հիմնադրամի նախաձեռնությամբ Բերձորում հիմնվել են պուրակներ, որոնք կոչվում են հայ մշակույթի նշանավոր գործիչների եւ Արցախյան գոյամարտի հերոսների անունով՝ Ստեփան Ալաջաջյանի, Մոնթեի, Դուշման Վարդանի, Թաթուլ Կրպեյանի եւ այլոց: Մարտի 19-ին Հակարի գետի ձախ ափին հիմնվեց Արցախյան ազատամարտի հերոս Լեոնիդ Ազգալդյանի 75-ամյակին նվիրված պուրակը: Միջոցառմանը ներկա էին ԵՊՀ ռեկտոր Արամ Սիմոնյանը, դասախոսներ, ուսանողներ, հյուրեր: Պուրակի ցուցանակը բացելուց հետո Արամ Սիմոնյանն ասաց.

-Լեոնիդը համալսարանական էր, եւ մենք բախտ ենք ունեցել տեսնելու նրան, աշխատելու նրա հետ: Այսօր հիմնում ենք նրա անվան պուրակը եւ ոգեկոչում խոր հարգանքով ու այն համոզվածությամբ, որ նրա գործը այսօր էլ շարունակվում է երիտասարդների կողմից:

Ինչպես ընդունված է, յուրաքանչյուր ծառատունկի ժամանակ Գուրգեն Մելիքյանն է տնկում առաջին շիվը եւ արտասանում Լեւոն Զավեն Սյուրմելյանի (1905-1995) «Ասացվածք՝ ծառ տնկելու առթիվ» բանաստեղծությունը:

Իրավագիտության ֆակուլտետի 3-րդ կուրսի ուսանող Գեւորգ Արշակյանը 4-րդ անգամ է մասնակցում բերձորյան ծառատունկին: Հավատում է՝ այսօրվա տնկիներն էլ են դառնալու հզոր ծառեր: Նույն ֆակուլտետի առաջին կուրսեցի Մարիա Պետրոսյանն առաջին անգամ է այցելել Արցախ: Վստահ է՝ իր տնկած ընկուզենու բերքից շատերն են օգտվելու:

Ծառատունկին մասնակցում էր «Կարին» ազգագրական երգի-պարի համույթը: Խմբի անդամները յուրաքանչյուր տնկիի մոտ հանդես էին գալիս մարտական պարերով: Նրանց էին միանում նաեւ ուսանողները: Միջոցառումն առանձնահատուկ խորհուրդ ունի «Կարինի» գեղարվեստական ղեկավար Գագիկ Գինոսյանի համար. նա եղել է Լեոնիդ Ազգալդյանի զինվորը:

-Ամեն անգամ սիրով ենք մասնակցում ծառատունկին, հիանում ու զարմանում ենք Գուրգեն Մելիքյանի աշխատասիրությամբ:

Արցախ կատարած ճանաչողական այցից հետո Երեւան վերադառնալիս ԵՊՀ ուսանողները կանգ առան Մոնթեին նվիրված պուրակի մոտ, որտեղ հուշաքարին գրված է հերոսի խոսքը. «Եթե կորցնենք Արցախը, կշրջենք մեր պատմության վերջին էջը»:

ԶՈՀՐԱԲ ԸՌՔՈՅԱՆ

Խորագիր՝ #11 (1182) 22.03.2017 - 28.03.2017, Բանակ և հասարակություն


23/03/2017