ՈՎ ՀԱՍԵԼ Է ՎԻՐԱՀԱՏԱՐԱՆ, ՓՐԿՎԵԼ Է

Ես հիացած եմ մեր զինվորների քաջությամբ

Ապրիլի 19-ի տվյալով՝  ՊՆ Կենտրոնական կլինիկական զինվորական հոսպիտալը ընդունել է 49 վիրավոր, այս պահին ծայրահեղ ծանր է միայն մեկի, իսկ ծանր՝ 6-ի վիճակը:

Հոսպիտալի ամբողջ բուժանձնակազմը օր ու գիշեր եղել է հոսպիտալում ու ամենայն բարեխղճությամբ կատարել իր մասնագիտական պարտքը: Մեր բժշկական խմբերը փոխգործակցության շրջանակում մեկնել են Արցախ և վիրավոր զինվորներին բուժօգնություն են տրամադրել տեղում, որպեսզի չկորցնենք թանկ րոպեները:

Մենք համագործակցել ու համագործակցում ենք քաղաքացիական բուժհիմնարկների բժիշկների հետ և բոլոր հնարավոր ուժերով պայքարում ենք, որ մեր վիրավոր տղաներին ցուցաբերենք ամենաբարձր կարգի բուժօգնություն:

Ես հպարտ ու հիացած եմ մեր զինվորների կամքով ու քաջությամբ՝ ոչ մի տրտունջ, ոչ մի բողոք: Հերոսավայել տանում են ցավը, բոլորն էլ պատրաստ են կրկին մեկնելու զորամաս: Այսպիսի տղաների համար բժիշկը սեփական կյանքն էլ չի խնայի:

Ես հիացած եմ մեր ժողովրդի զինվորասիրությամբ: Հոսպիտալի մուտքը միշտ մարդաշատ է, մարդիկ հետաքրքրվում են զինվորների առողջությամբ, նվերներ են բերում:

Արամ Ասատուրյան

ՊՆ Կենտրոնական կլինիկական

զինվորական հոսպիտալի պետ

Նոր սերունդը հայրերին չի զիջում

Ես ապշած եմ նրանց մայրերի ոգու ուժից: Չեն ընկճվում, չեն կոտրվում, սարի պես կանգնած են իրենց որդիների թիկունքին:

Արցախյան պատերազմում վիրավորված, ձեռք ու ոտք կորցրած իմ նախկին հիվանդների հետ շրջում էինք հիվանդասենյակներով ու ոգևորում մեր զինվորներին: Ես պիտի ասեմ, որ նոր սերունդը ոչ միայն չի զիջում Արցախն ազատագրած հերոսներին, այլ՝ է՛լ ավելի խիզախ է ու աննկուն: Նրանք քաջագործություններ են արել առաջնագծում և նույն խիզախությամբ դիմակայում են ցավին:

Մենք բոլոր ճակատներում ենք հաղթելու, որովհետև խիզախ զինվորներ ունենք, հայրենասեր ու հերոս մայրեր:

Լևոն Ժամագործյան

ՊՆ Կենտրոնական կլինիկական զինվորական հոսպիտալի վնասվածքաբանության բաժանմունքի պետ

Թուրքին չպիտի թողնես գլուխը բարձրացնի

22 տարի առաջ այս օրերին ես նույնպես հոսպիտալում էի. վիրավորվել էի Արցախը թուրքերից ազատագրելիս: Հիմա իմ որդին է վիրավորվել մեր հաղթանակը պաշտպանելիս: Արսենս վիրավորվել է ծնոտից: Վիրահատել են: Արդեն կարողանում է խոսել: Թողնեմ՝ հենց հիմա էլ սահման կգնա: Ես հպարտ եմ: Թուրքին չպիտի թողնես գլուխը բարձրացնի: Անընդհատ պիտի խփես, թե չէ՝ ինքը կխփի:

Գագիկ Մարգարյան

զինվորի հայր

Ցավի ու հպարտության անմոռանալի օրեր

Իմ բոլոր հիվանդներն անցել են առաջնային վիրաբուժական մշակում կայազորային հոսպիտալներում, մեզ մոտ իրականացվում են մասնագիտական վիրահատություններ:

Այս խիզախությունը, սերը, համախմբվածությունը, նվիրումը միմյանց ու հայրենիքի հանդեպ դեռ երկար ժամանակ կսնի մեր ոգին:

Կարեն Սևտերտերյան

ՊՆ Կենտրոնական կլինիկական զինվորական

հոսպիտալի դիմածնոտային բաժանմունքի պետ

Ինչի՞ս վրա ժպտամ. ես՝ այստեղ, տղերքը՝ սահմանին

Բժիշկներից բան չեմ հասկանում: Որ իրենց լսես՝ ոչ մի անվնաս օրգան չունեմ: Բա որ լյարդս, թոքս, որովայնս վնասված են, ոնց կարողացա էդքան ճանապարհ անցնել վիրավոր վիճակում: Շունչս էր կտրվում, հիմա արդեն լավ եմ: Ինչի՞ս վրա ժպտամ. ես՝ այստեղ, տղերքը՝ սահմանին: Լուր էլ չունեմ: Թե կարողանաք, ասեք՝ տղե՛րք, ձեր ցավը տանեմ, դրանց ցույց տվեք հայի ուժը:

Վահան Սարգսյան

շարքային

Զորակցում էին սփյուռքահայ մեր գործընկերները

Ոչ միայն Հայաստանում, այլև արտերկրում բնակվող մեր հայ գործընկերները զանգում էին մեզ, առաջարկում իրենց օգնությունը: Ասում էին՝ եթե պետք է, անմիջապես կգանք, եթե ինչ-որ բան է անհրաժեշտ, կուղարկենք: Այս միասնականությունը, այս սերը սեփական բանակի ու զինվորի հանդեպ բոլորիս ուժ տվեց….

Մենք անում ենք անհնարինը, որպեսզի ոչ միայն փրկենք մեր վիրավոր զինվորների կյանքը, այլև շարք վերադարձնենք նրանց:

Սևակ Շահբազյան

ՊՆ Կենտրոնական կլինիկական զինվորական

հոսպիտալի վիրաբուժության բաժանմունքի պետ

Հիմա սահմանում իմ տեղը բաց է

Բժիշկներից մի բան եմ խնդրում՝ ծնոտս տեղը դնեն, գնամ-կանգնեմ իմ տեղը: Ամեն մեկս մեր տեղն ունենք սահմանին՝ ամեն հայ տղամարդ: Ու եթե դու սահմանին չես, ուրեմն քո տեղը բաց է: Իմ տեղը բաց է հիմա: Պիտի գնամ: Եթե դու չգնաս, թուրքն է գալու: Թուրքի ճանապարհը պիտի փակես… Հայրս էլ 90-ականներին է կռվել:

Արսեն Մարգարյան

շարքային

ՀՕՄ-ի անդամները նվերներ են բերել վիրավոր զինծառայողների համար:

Կարմիր Խաչի աշխատակիցները եկել են ՊՆ Կենտրոնական կլինիկական զինվորական հոսպիտալ՝ հոգեբանական աջակցություն ցուցաբերելու վիրավոր զինծառայողների ծնողներին:

Պատրաստեց Գ. ՊՈՂՈՍՅԱՆԸ