Language:

  • Հայերեն
  • Русский
  • English

ՄՈՒՍԱ ԼԵՌ՝ ՀԱՐՅՈՒՐԱՄՅԱ ԼԵԳԵՆԴ



Օրերս լույս է տեսել բանասիրական գիտությունների դոկտոր, պրոֆեսոր, բանագետ, բանահավաք, ժողովրդագետ, ցեղասպանագետ Վերժինե Սվազլյանի հերթական՝ «Մուսա լեռան հերոսամարտը. ականատես վերապրողների վկայություններ» արժեքավոր աշխատությունը:

Վերժինե Սվազլյանի աշխատությունն ընդգրկում է Մուսա լեռից տարագրված, Հայաստանում եւ սփյուռքում բնակություն հաստատած, Մուսա լեռան հերոսամարտին մասնակցած եւ այլ պատմական իրադարձությունների ականատես-վերապրողներից դեռեւս 1955 թ.-ին գրի առած (մասամբ նաեւ տեսագրած եւ ձայնագրած) հուշ-վկայություններն ու պատմական տարաբնույթ ժողովրդական ստեղծագործությունները՝ պատմական երգ-վկայություններ, ռազմական երդումներ, ընդ որում՝ Մուսա լեռան բարբառով՝ կից գրական հայերեն թարգմանությամբ:

Հատորը բաղկացած է երկու բաժնից՝ հայերեն եւ անգլերեն: Վերջինս իրականացրել է անգլերենի քաջ գիտակ Տիգրան Ծուլիկյանը: Հատորն իր մեջ ամփոփում է հայերեն եւ անգլերեն քարտեզներ, երգերի նոտագրություններ, ժողովրդական նյութերի եւ ասացողների փաստագրական աղյուսակ եւ մուսալեռցի վերապրողների լուսանկարներ: Գրքի վերջում տեղադրված է «Հին եւ Նոր Մուսա լեռ» ֆիլմի խտասկավառակը, որտեղ անդրադարձ է կատարվում հայկական Կիլիկիայի երբեմնի փառքին, անհետացող մշակութային գանձերին, ապա՝ Հայրենի հողի վրա Նոր Մուսա լեռ ավանում երկինք խոյացող հերոսամարտի հուշակոթողի մոտ նոր սերունդների երգ ու պարին, իսկ վերջում «Շարական» համույթը (գեղ. ղեկավար՝ Դանիել Երաժիշտ) կատարում է մուսալեռցիների հայտնի պարերգը, որը կորստից փրկել է Վերժինե Սվազլյանը, որի հետ ամեն մի հանդիպումը պատմության կարեւոր դաս է յուրաքանչյուրի համար:

Խորագիր՝ #45 (1114) 19.11.2015 - 25.11.2015, Հոգևոր-մշակութային, Պատմության էջերից


19/11/2015