Հայերեն | На русском | In English
ՀՀ պաշտպանության նախարար Սեյրան Օհանյանը մայիսի 12-ին աշխատանքային այց է կատարել Տավուշի մարզ, եղել առաջնագծում։
Այնուհետեւ մարզի զորամասերից մեկում մամուլի ասուլիս է հրավիրել։ Ներկայացնում ենք հատվածներ պաշտպանության նախարարի խոսքից.
«Այս ժամանակահատվածն առանձնահատուկ էր։ Ձեւավորվել է 2016-2020թթ. ԶՈւ պաշտպանության ոլորտի զարգացման պլանը, որտեղ կներառվեն պաշտպանական ոլորտի բոլոր գերատեսչությունների համապատասխան խնդիրները՝ պաշտպանական միասնական համակարգ ձեւավորելու համար»։
♦♦♦
«Այսօր զինված ուժերի հավասարակշռության եւ նոր սպառազինության ու ռազմական տեխնիկայի ձեռքբերման, բարոյահոգեբանական մակարդակի եւ որակական պատրաստվածության շնորհիվ ուժերի հավասարակշռությունը պահպանվում է»։
♦♦♦
«Հայաստան-Ռուսաստան հարաբերությունները բարձր մակարդակի վրա են հատկապես ռազմատեխնիկական համագործակցության առումով»։
♦♦♦
«Միջազգային համագործակցության ոլորտում պահպանվել են բանակցային եւ գործընկերային հարաբերությունների գործող շրջանակները, որոնք թույլ են տվել պահպանելու Հայաստանի ներուժն ու կարողությունները։ Չնայած հաշվետու ժամանակահատվածում միջազգային հակամարտությունների աճին, ՊՆ-ն ապահովել է օտարերկրյա պետությունների, կազմակերպությունների հետ ռազմաքաղաքական հարաբերությունների համաչափ զարգացում՝ պահպանելով միջազգային երաշխիքների փոխլրացնող համակարգը։
