Հայերեն | На русском | In English

Մենյու
Խորագրեր
ՀՀ ԶՈՒ ՀՈԳԵՎՈՐ ԱՌԱՋՆՈՐԴ ԳԵՐԱՇՆՈՐՀ Տ. ՎՐԹԱՆԵՍ ԵՊԻՍԿՈՊՈՍ ԱԲՐԱՀԱՄՅԱՆԻ 2015 ԹՎԱԿԱՆԻ ԶԱՏԿԱԿԱՆ ՈՒՂԵՐՁԸ
ՀՀ ԶՈՒ ՀՈԳԵՎՈՐ ԱՌԱՋՆՈՐԴ ԳԵՐԱՇՆՈՐՀ Տ. ՎՐԹԱՆԵՍ ԵՊԻՍԿՈՊՈՍ ԱԲՐԱՀԱՄՅԱՆԻ 2015 ԹՎԱԿԱՆԻ ԶԱՏԿԱԿԱՆ ՈՒՂԵՐՁԸ

«Քաջալերվեցե՛ք, որովհետև ես հաղթեցի աշխարհին» (Հովհ. 16:33)

Հիսուս Քրիստոսի Հրաշափառ Հարության տոնի ավետիսով այսօր խնդությամբ է լցված մեր հոգին, քանզի «Այստեղ չէ, որովհետև հարություն առավ» հրեշտակաձայն ավետիսով փառավորում ենք Քրիստոսի Սուրբ Հարությունը, որով բացվեց փրկության ճանապարհը, և մխիթարություն սփռվեց մարդկային հոգիներում:

Գոհություն ենք մատուցում Ամենակարող Աստծուն, որ Տիրոջ երկնառաք շնորհներով մշտավառ է մեր ժողովրդի հավատքը, զորավոր եկեղեցանվիրումն ու հայրենասիրությունը, և հզոր ու ամուր է Հայոց Բանակը:

Սուրբ Հարության շնորհանորոգ ու փրկագործ այս օրերին Միածնի Իջման Սուրբ Սեղանի առջև ի խորոց սրտի աղոթքով հայցում ենք Հարուցյալ Փրկչից, որպեսզի համայն աշխարհին` պետություններին ու ժողովուրդներին, պարգևի խաղաղություն, ապահովություն ու կյանքի նորոգ ընթացք` հիմնված սիրո, հաշտության, եղբայրության ու փոխգործակցության սկզբունքների վրա, որպեսզի աշխարհում ընդմիշտ դադարեն թշնամությունը, ահաբեկչություններն ու պատերազմները, և վերացվեն դրանց կործանարար հետևանքները:

Հոգեպարար ու բերկրալի այս օրերին խնդրանքս է առ Հարուցյալ Փրկիչը, որ Իր Սուրբ Աջով միշտ պահպանի Հայոց Բանակը, հայոց Բանակի քաջարի զինվորներին ու հրամանատարներին: Աղոթում ենք, որ Հարուցյալ Փրկչի աստվածային սիրո շնորհները ճառագեն ամբողջ աշխարհում` սփռելով շողերը հույսի, եղբայրության, համերաշխության ու խաղաղության, որպեսզի մարդկությունը քրիստոսավանդ պատվիրանների իրագործումով երկրի վրա նորիմաստ իրականություն դարձնի «խաղաղություն երկրի վրա և հաճություն մարդկանց միջև» հրեշտակաձայն ավետիսը:

Փրկչի Սուրբ Հարության ավետիսը աշխարհային առօրյա հոգսերի ու մտահոգությունների առջև նոր ու բարի հույսեր և սպասումներ է պարգևում քրիստոնյաներիս, նոր բովանդակություն ու նոր իմաստ հաղորդում մեր կյանքին ու գործունեությանը և մասնավորաբար մեր ժողովրդին` նորոգելու հավատքը, հույսն ու սերը և առավել զորացնելու միասնականության ու եղբայրության ոգին` հանուն ազգանվեր, հայրենանվեր ու եկեղեցաշեն նոր ձեռքբերումների և աշխարհասփյուռ հայորդիների բարօր կյանքի:

Տիրոջ Սուրբ Հարության ավետիսը հրավիրում է վերափոխման, հրավեր, որ հոռետեսությունը լավատեսության է փոխակերպում և վհատությունը` խանդավառության:

Մեր աղոթքն ու հայցն է առ Աստված, որ Հարուցյալ Քրիստոս Իր Սուրբ Աջի հովանու ներքո պահպանի հայոց ազգը, Հայաստան աշխարհը, Հայոց Եկեղեցին ու Բանակն անսասանության, խաղաղության ու առաջընթացի մեջ:

ՔՐԻՍՏՈՍ ՅԱՐԵԱՒ Ի ՄԵՌԵԼՈՑ

ՕՐՀՆԵԱԼ Է ՅԱՐՈՒԹԻՒՆԸ

ՔՐԻՍՏՈՍԻ