Language:

  • Հայերեն
  • Русский
  • English

ՓԱՌՔՈՎ ՊՍԱԿՎԱԾ



Մեկ տարի առաջ` հունվարի 19-ի լույս 20-ի գիշերը, ղարաբաղա-ադրբեջանական հակամարտ զորքերի շփման գծի հյուսիսարևելյան (Ջրաբերդ) և հարավարևելյան (Կորգան) ուղղություններում արձանագրվեցին հակառակորդի խափանարար խմբերի ներթափանցման միաժամանակյա փորձերը: ԼՂՀ զինված ուժերի առաջապահ ստորաբաժանումները երկու ուղղություններով էլ մարդկային ու նյութական զգալի կորուստներ պատճառելով հակառակորդին` հետ շպրտեցին ելման դիրքեր:

Թշնամու հետ առճակատման ընթացքում իր առջև դրված մարտական խնդիրը արիաբար կատարելիս հյուսիսարևելյան ուղղության դիրքերում զոհվեց կրտսեր սերժանտ Արմեն Հովհաննիսյանը:

Խիզախ հայորդին հետմահու պարգևատրվել է «Հայրենիքին մատուցած ծառայությունների համար» առաջին աստիճանի մեդալով:

ՓԱՌՔՈՎ ՊՍԱԿՎԱԾ

Նվիրվում է հերոս սահմանապահ

Արմեն Հովհաննիսյանին

Եռաբլուրը սրբազան վայր է`

Մեր բիբլիական Մասսին հավասար,

Լուսեղեն վշտի մեջ հպարտ մայր է,

Արցունքոտ հող է, փառքի ջահել սար:

Այն մեր մշտարթուն գունդն է անմահաց,

Որ համալրվեց նոր քաջազունով`

Փառքով պսակված, սեգ ճակատը բաց,

Սահմանապահը` Արմեն անունով:

Թուրք ոհմակի դեմ ելավ անվարան,

Կարեվեր վերքով թշնամուն վանեց,

Տոկաց դավի դեմ հանց պողպատ վահան,

Իր մահով անգամ ազգ միաբանեց:

Նա պիտի դառնար արվեստի մշակ,

Դարձավ հայրենյաց զինվորը հավետ,

Եվ ամենավեհ իր այդ կոչումով

Նա կապրի հայոց բյուր դարերի հետ:

Ռուբեն ԳՐԻԳՈՐՅԱՆ
20.01.2015թ.

Խորագիր՝ #02 (1071) 22.01.2015 – 28.01.2015, Բանակ և հասարակություն


22/01/2015