Հայերեն | На русском | In English

Մենյու
Խորագրեր
ՊԱՀԱՆՋ ԵՎ ԵՐԴՈՒՄ

20-րդ դարասկզբին տեղի ունեցած Հայոց ցեղասպանությունը մարդկության պատմության մեջ կատարված ամենածանր ու զարհուրելի ոճրագործություններից է:

Համաշխարհային պատերազմը պատեհ առիթ համարելով` Օսմանյան Թուրքիան գործի դրեց հայության բնաջնջման իր հրեշավոր ծրագիրը` հայ ժողովրդին պատճառելով անլուր տառապանքներ, մարդկային ու նյութական ահռելի կորուստներ: Մարդատյաց վայրագ մոլուցքով իրագործված զանգվածային կոտորածներին զոհ գնաց ավելի քան 1,5 միլիոն հայ: Արեւմտյան Հայաստանը հայաթափվեց, հայ ժողովուրդը հայրենազրկվեց, խաթարվեց նրա բնապատմական ընթացքը: Մահվան օրհասից փրկված եւ աշխարհի չորս կողմերում հայտնված հարյուր հազարավոր հայեր կրեցին գաղթականի դառը ճակատագիրը:

Կատարվածը ոչ միայն հայության, այլեւ մարդկության դեմ ուղղված հանցագործություն է: Այն վաղեմության ժամկետ չունի, երբեւէ պետք է դատապարտվի, եւ հայ ժողովուրդն արդար հատուցում պետք է ստանա:

Աշխարհի ավելի քան քսան պետություն եւ միջազգային կազմակերպություններ, արդարության հիմնարար գաղափարին հավատարիմ, ճանաչել եւ դատապարտել են Հայոց ցեղասպանությունը: Մինչդեռ Թուրքիան, ապաշխարելու եւ իր մեղքը քավելու փոխարեն, շարունակում է անբարո ժխտողականությունը: Քանի դեռ Թուրքիան չի ապաշխարել, ոճրագործի խարանը մնալու է նրա ճակատին:

Սիրելի՛ հայրենակիցներ, քույրեր եւ եղբայրներ

Կանցնի եւս մեկ տարի, եւ կլրանա Հայոց ցեղասպանության 100-ամյա տարելիցը: Ժամանակն անզոր է մոռացության մատնելու սոսկալի ոճիրը: Ոչինչ չի մոռացվել եւ չի մոռացվելու, հայ ժողովուրդը երբեք էլ չի լռելու: Չպատժված հանցագործությունից ծնվում են նորերը: Սումգայիթի, Բաքվի, Մարաղայի, Նախիջեւանի, Քեսաբի հայության ջարդերն ու հալածանքները ցեղասպանության մերօրյա ոճիրներ են եւ հայակործան նախկին ծրագրերի շարունակությունը:

Մենք մերժում ենք Հայոց ցեղասպանության ճանաչման հարցում դրսեւորվող շահախնդիր մոտեցումները եւ գործուն մասնակցությամբ պետք է սատարենք գործընթացն առաջ տանելուն նպատակաուղղված բոլոր ջանքերին: Դասեր քաղելով պատմությունից՝ պետք է զորացնենք մեր ազգային միասնականությունն ու ինքնապաշտպանական ներուժը: Միշտ պետք է հիշենք, որ լիակատար բնաջնջումից հայությունը փրկվեց նախեւառաջ անձնուրաց ինքնապաշտպանության եւ իր բացառիկ տոկունության շնորհիվ, եւ որ Արցախյան գոյամարտում տարած հերոսական հաղթանակն իր ուժին ապավինելու հայ ժողովրդի իրատեսության արգասիքն է:

Ուստի արդարության մեր պահանջը ներկայացնելու հետ մեկտեղ պետք է ներքուստ երդվենք չթողնել, որ անցյալի արհավիրքները կրկնվեն, եւ հայության իրավունքները ոտնահարվեն:

Այդ նկատառումով եւ մեր միակամությունն արտահայտելու նպատակով ՀՀ պաշտպանության նախարարին առընթեր հասարակական խորհուրդը նախաձեռնում է համացանցային համահայկական ստորագրահավաք խորհրդանշական կարգախոսի ներքո.

«1,5 միլիոն ձայն` ընդդեմ ոճիրի,

1,5 միլիոն զինվոր` եթե պահանջվի»:

Կոչ ենք անում բոլորին մասնակցել ստորագրահավաքին:

Պահանջե՛նք եւ երդվե՛նք:

ՀՀ պաշտպանության նախարարին

առընթեր հասարակական խորհուրդ