Հայերեն | На русском | In English
Ազգային բանակի մարտունակության է՛լ ավելի ամրապնդման նպատակով ՀՀ պաշտպանության նախարար Սեյրան Օհանյանը ՀՀ ԶՈՒ ԳՇ պետի տեղակալ, գեներալ-լեյտենանտ Հայկազ Բաղմանյանի և բարձրաստիճան այլ սպաների ուղեկցությամբ հուլիսի 23-ին և 24-ին աշխատանքային շրջայց կատարեց բանակային զորամիավորումների ենթակա մի շարք զորամասեր:
Այցի նպատակներից էին նաև զորքերում կարգապահության բարձրացմանն ուղղված համալիր միջոցառումների շրջանակներում զինծառայողների ծառայական պարտականություններին, զորանոցային կյանքին, կատարված բազմաթիվ շինարարական աշխատանքներին անմիջականորեն ծանոթանալը, ինչպես նաև զորամիավորումների և զորամասերի անձնակազմերի հետ հանդիպումը, ներկա մարտահրավերների պայմաններում հայոց բանակի զինծառայողներից պահանջվող զինվորական կանոնադրության դրույթներին, նախարարի հրամաններին ու ցուցումներին հետևելն ու դրանցով անվերապահորեն առաջնորդվելը: Պաշտպանության նախարարին դիմավորեցին զորամիավորումների ու զորամասերի հրամանատարները:
Առաջին կանգառը գնդապետ Տիգրան Փարվանյանի հրամանատարությամբ գործող զորամիավորումում էր, որի ենթակայությամբ գործող և գնդապետ Կ. Դավթյանի և փոխգնդապետ Ա. Մինասյանի հրամանատարությամբ գործող զորամասերում տեղի ունեցան ցուցադրական պարապմունքներ, որոնց ընթացքում զինվորները սահմանված ժամկետում վարժ ու հստակ կատարեցին իրենց առջև դրված խնդիրները:
«Հրաձգային զենքի քանդում-հավաքում` փակ աչքերով» վարժությունը դիտելուց հետո Սեյրան Օհանյանը խոսեց զինվորական կանոնադրությամբ նախատեսված գործնական պարապմունքներն ավելի պարզ, մատչելի ու կիրառական դարձնելու անհրաժեշտության մասին: Մասնավորապես` ուսուցանող սպաներից մեկին հարցրեց, թե կարո՞ղ է արդյոք նախորոշված չափանիշներից դուրս ստեղծագործական մոտեցում ցուցաբերել տվյալ պարապմունքի մեթոդիկան առավել կատարելագործելու համար: Նախարարը հաճելիորեն զարմացավ ոչ միայն հայոց բանակի սպայի պատրաստակամությունից, այլև շարային պատրաստության մի քանի նոր տարրերի հրահանգավորումից հետո նման վարժություններ երբեք չկատարած զինվորների արագ ընդօրինակման գործողություններից:
«Հոգեբանական արգելքի հաղթահարում» ցուցադրական պարապմունքի ընթացքում տպավորիչ էին ինչպես մարտիկների՝ հակագազով թաքստոցներից խումբ-խումբ և աննկատ դուրս գալը, ծխաքողարկված տարածքով ու բարդ արգելապատնեշների միջև մանևրելով անցումները, այնպես էլ բաց դաշտում հակագազերը նետելն ու գրեթե միաժամանակ` հանկարծակի հայտնված թշնամու դիվերսիոն-հետախուզական խմբի հետ ձեռնամարտի բռնվելը, նրանց ոչնչացնելն ու կրակի տակ արգելքների հետագա հաղթահարումը: Ընդ որում, ուսուցանող սպա փոխգնդապետ Գ.Մկրտչյանը այս դժվարին առաջադրանքի կատարման ցուցադրական պարապմունքին ներգրավել էր միաժամանակ տարբեր զորակոչերի զինվորների և ամեն ինչ այնպես էր կազմակերպել, որ ներկաները հիացան զինվորների ցուցաբերած հմտությամբ:
Այնուհետև Սեյրան Օհանյանն այցելեց փոխգնդապետ Ա.Ջուլհակյանի հրամանատարությամբ գործող զորամասի նորակառույց ուսումնական տեղամասերից մեկը: Գործնական պարապմունքներն առավել արդյունավետ իրականացնելու համար, անհրաժեշտ բոլոր չափորոշիչները հաշվի առնելով, բարդ տեղանքում կառուցվել է նոր ավտոերթուղի, որը դեռևս փորձարկման փուլում է: Այնուհետև բացազատված տարածքում, դիտողական ցուցավահանակների մոտ, տեղի ունեցավ նոր ավտոերթուղուն առնչվող հարցերի մանրակրկիտ քննարկում, որի ընթացքում, որպես ուսուցանող սպա, հանդես եկավ զորամիավորման սպառազինության պետ, գնդապետ Արթուր Մարտիրոսյանը: Նախարարն արեց իր դիտողություններն ու առաջարկությունները, որոնց շուտափույթ իրագործման համար համապատասխան լիազոր մարմնին տրվեցին հանձնարարականներ:
Սեյրան Օհանյանը սահմանամերձ զորամասերի այցի շրջանակում եղավ նաև գնդապետ Կ. Սերոբյանի հրամանատարությամբ գործող մոտոհրաձգային զորամասում: Այստեղ նույնպես ամենուր աչքի էր ընկնում զինծառայողների բարձր կարգապահությունը: Զորամասի տարածքում գումարտակի զորանոցը, ուր հիմնանորոգման հսկայածավալ աշխատանքներ են կատարվել, իր չափանիշներով իրավամբ ողջ ՀՀ ԶՈՒ-ում կարող է օրինակելի համարվել:
Տեղի ունեցավ զորամիավորման գումարտակների, դիվիզիոնների հրամանատարների և հրամանատարի տեղակալների հավաք, որն իր բնույթով ուսուցողական էր: Տարբեր զորատեսակներ ներկայացնող սպաներին նախարարը նախ տվեց իրենց զինվորական մասնագիտությանն առնչվող բազմաթիվ հարցեր, ապա ստացած պատասխանների վերաբերյալ եզրահանգումը ներկայացրեց համառոտ զեկույցի տեսքով:
♦♦♦
Գնդապետ Տիգրան Փարվանյանի հրամանատարությամբ գործող զորամիավորման վարչակազմի հետ հանդիպմանը Սեյրան Օհանյանը մանրակրկիտ ներկայացրեց շրջայցի արդյունքները՝ նշելով իր գոհունակությունը զորամիավորման ենթակա զորամասերում մարտական պատրաստության, պատրաստականության, զինվորական կարգապահության ընդհանուր վիճակից: Նա բարձր գնահատեց գնդապետ Տ. Փարվանյանի պաշտոնավարման ընթացքում կատարված գործողությունները, նշելով՝ «հրադադարի յուրաքանչյուր օր պետք է օգտագործել մեր բանակի առավել հզորացման համար»:
ՎԱՉԵ ՄԿՐՏՉՅԱՆ
