ՄԱՍՆԱԿՑԵԼ ՈՉ ԹԵ ԽՈՍՔՈՎ, ԱՅԼ ԳՈՐԾՈՎ

Հանրապետությունում շարունակվում են քսանհինգօրյա վարժական հավաքները, որոնց նպատակն անփոփոխ է՝  բարձրացնել պահեստազորում հաշվառված քաղաքացիների ռազմական պատրաստության մակարդակն ու մասնագիտական ներուժը:

-Մասնակիցների տրամադրությունը բարձր է, բոլորն էլ գիտակցում են հավաքների կարևորությունը, հասկանում են, որ հայրենանվեր առաքելություն են կատարում,- ասում է ՊՆ ԶԶՀԾ Լոռու մարզի տարածքային ստորաբաժանման պետի տեղակալ, փոխգնդապետ Հայկ Մանթաշյանը:

Զրուցում ենք վարժական հավաքի մասնակիցների հետ: Մեր առաջին զրուցակիցը:

-Ողջունում եմ հավաքների գաղափարը: Արհեստավոր եմ, ժամկետային ծառայության ժամանակ էլ հրաձիգ եմ եղել: Կարծում եմ՝ բոլոր հայ տղամարդիկ պարտավոր են գալ ու մասնակցել հավաքներին, որ, հարկ եղած դեպքում, կարողանան կատարել իրենց առաքելությունը,- ասում է վահագնաձորցի Վահրամ Սարգսյանը:

-Խուսափել չկա: Իմ շրջապատի մարդկանցից խուսափողներ չկան ու չեն էլ լինի,- վստահեցնում է հավաքի մասնակից Գերասիմ Կիրակոսյանը:

Զորակոչվողների մեջ է նաև քառօրյա մարտական գործողությունների մասնակից Հովհաննես Մելիքյանը:

-Նման հավաքների առաջին անգամ եմ մասնակցում: Տրամադրությունս մարտական է: Շատ սիրով ու պատրաստակամորեն եմ գնում պարտքս հայրենիքիս առաջ կատարելու: Ինչքան էլ պետք լինի՝ գնալու եմ,- ասում է նա:

Արման Մնացականյանն էլ, ըստ հավաքների պլանի, գումարտակներից մեկի հրամանատարի բարոյահոգեբանական ապահովման գծով տեղակալն է: Մեր հանդիպման պահին նա իր ապագա ենթականերին օգնում էր համազգեստ ստանալ.

-Անձնակազմը հանդերձանքը ստանալուց հետո կներկայանա համապատասխան ստորաբաժանում, որտեղ կիրականացվի  հաստիքային զենքի և սպառազինության կցագրումը: Իմ խորին համոզմամբ՝ այս հավաքներն իսկապես անհրաժեշտ են, քանի որ մասնակիցները հնարավորություն կունենան թարմացնելու իրենց զինվորական գիտելիքներն ու մասնագիտական հմտությունները, ինչն էլ կնպաստի, որ նրանք հմտորեն կատարեն առաջադրված խնդիրները:

ԶԱՎԵՆ ՄԱԹԵՎՈՍՅԱՆ