ԵՐԿՆԱՅԻՆ ՎԱՀԱՆ

Փոխգնդապետ Վահե Հակոբյանի հրամանատարությամբ գործող ուսումնական զորամասում ենք՝ հակաօդային պաշտպանության կրտսեր հրամանատարների «դարբնոցում»:

Ուսումնական  գործընթացն ընթանում է իր հունով. լսարաններում մասնագիտական պարապմունքներ են՝ ապագա հակաօդային պաշտպանները ծանոթանում են «Իգլա» համակարգի մարտավարատեխնիկական բնութագրին, վարժասարքերով  խոցում  շարժական թիրախները, իսկ դրսում էլ ֆիզպատրաստության պարապմունքներ են։

-Կուրսանտների օրվա կարգացուցակը  հագեցած է: Հիմնականում զբաղված են մարտական պատրաստության, մասնագիտական ու ֆիզիկական պատրաստության պարապմունքներով: Ընդ որում, ուսումնանյութական բազան պարբերաբար թարմացվում  է: Ժամանակի հետ փոխվում են զինատեսակները, բնականաբար, նաեւ ուսուցման ծրագրում են կատարվում փոփոխություններ, մշակվում են մեթոդական համապատասխան ուղեցույցներ: ՀՕՊ-ը պահանջում է թիմային աշխատանք, շղթայական փոխգործակցություն, այսինքն՝ վերջնական արդյունքը պայմանավորված է հաշվարկի յուրաքանչյուր անդամի  գրագետ ու ներդաշնակ գործողությամբ. թեկուզ աննշան թերացումը կարող է վճռորոշ  ու ճակատագրական լինել մարտի դաշտում,- ասում է զորամասի հրամանատարի ուսումնական գծով տեղակալ, մայոր Դավիթ Պետրոսյանն ու շարունակում,- մեր ուսումնական զորամասում ուսանած կուրսանտները մշտապես իրենց լավագույնս են դրսեւորել մարտական  տարբեր գործողություններում,  խոցել են հակառակորդի ինքնաթիռներ, անօդաչու թռչող սարքեր:  Հակաօդայինները  երկնքի սահմանապահներն են, երկնային վահանը:

***

Զրուցում ենք կուրսանտների հետ եւ եւս մեկ անգամ համոզվում, որ խելացի, լավ պատրաստված տղաներ են, որոնք ուսումնական փուլը կավարտեն և արդեն որպես մասնագետներ կհամալրեն ՀՕՊ զորամասերն ու ստորաբաժանումները:

-Հակաօդային պաշտպանությունն առանձնահատուկ նշանակություն ունի ժամանակակից մարտերում, քանի որ վճռորոշ հարվածը հիմնականում հենց օդուժն է հասցնում, իսկ դրա կասեցնողն ու հակազդողը հակաօդայիններն են,- ղեկավարման ջոկի կուրսանտ Հովհաննես Հովհաննիսյանը ներկայացնում է իրենց զորատեսակի դերն ու կարեւորությունը: -Զորամասում պատերազմի  մասնակից սպաներ ունենք, որոնք ավելի խիստ են, ավելի պահանջկոտ, սակայն մենք գիտակցում ենք, որ այդ խստությունը  հենց մեզ համար է, քանզի այսօր ուսուցման մեջ թերանալը վաղը կարող է ճակատագրական լինել:

Հովհաննեսը Վայոց ձորի Քարագլուխ գյուղից է, զինվորականի որդի: Հայաստանի ազգային պոլիտեխնիկական համալսարանի  առաջին կուրսն ավարտել ու  զորակոչվել է:

-Հայրս շուրջ 23 տարի զինված ուժերում է ծառայում: Հայրս, հորեղբայրս, քեռիս  պատերազմի մասնակիցներ են, ինչն ինձ ավելի է պարտավորեցնում պատվախնդրորեն ծառայել, գերազանց տիրապետել զինվորական մասնագիտությանս,- ասում է նա:

-Ուսման մեջ չափազանց կարեւոր է ամեն վայրկյանն  արդյունավետ օգտագործելը,  հմտությունները կատարելագործելը: Գիտակցում ենք,  որ նաեւ մեզնից  է կախված  հայրենիքի անվտանգությունը: Մեր սպաներն էլ  մանրակրկիտ, հնարավորինս մատչելի  բացատրում են ամեն ինչ,- մեր զրույցին է միանում Մխիթար Հերացու անվան պետական բժշկական համալսարանի ուսանող Ռուբեն Մանգասարյանը, որ մասնագիտանում է «Իգլա» զինատեսակի վրա: -Փոքր տարիքից երազում էի օդաչու դառնալ, ինքնաթիռ վարել, բայց այնպես ստացվեց, որ հիմա հակաօդային պաշտպանության մասնագետ եմ դառնալու,- ասում է նա և կատակով մեջբերում հակաօդայինների ոչ պաշտոնական կարգախոսներից մեկը. «Ինքներս չենք թռչում եւ ձեզ էլ թույլ չենք տա»:

Սուրեն Գիքինյանն էլ ղեկավարման ջոկի մասնագետ է, պլանշետավար: Հայաստանի պետական տնտեսագիտական համալսարանի Գյումրու մասնաճյուղի ուսանող է, ապագա  ֆինանսիստ: Սուրենը նաեւ մարզիկ է, տասը տարի  կարատե մարզաձեւով է զբաղվել, ունի նաև նկարչական հակումներ:

-Հանգստի ժամերին նկարում եմ, շուտով համաբանակային  մրցույթի եմ մասնակցելու «Հայոց սպարապետներ» թեմայով: Մեր մասնագիտությունում անչափ կարեւորվում է հիշողությունը, շատ թվեր պետք է մտապահենք: Զորամասում բոլոր պայմաններն առկա են մասնագիտական գիտելիքները հնարավորինս կատարելագործելու ու զարգացնելու: Ի դեպ, հնարավոր է, որ ծառայությունս ավարտելուց հետո   մնամ բանակում,- ասում է Սուրենը:

-Յուրաքանչյուր զինվոր պետք է մշտապես կատարելագործի մասնագիտական որակներն ու հմտությունները՝ հստակ գիտակցելով իր դերն ու պատասխանատվությունը հայրենի բնօրրանն ամուր  ու անառիկ պահելու գործում: Երկու տարուց հետո էլ ինձ համար ծառայությունը հայրենիքին չի ավարտվելու, հետագայում էլ կսատարեմ մեր բանակին,  գիտելիքներս կծառայեցնեմ զինվորի կյանքեր փրկելուն,- անկեղծանում է մեր զրույցի վերջին մասնակիցը՝ ապագա ծրագրավորող Արմեն Խաչատրյանը։

Արմենը բանակ է զորակոչվել Հայաստանի Ամերիկյան համալսարանի երկրորդ կուրսից: Ինչպես ընկերները նշեցին, բազմագիտակ է, հետաքրքրությունների լայն շրջանակ ունի, տարված է աստղագիտությամբ, անընդհատ ինքնակրթվում է:

Քաղաքացիական կյանքում տարբեր մասնագիտություններ ընտրած  երիտասարդներին այսօր  միավորել է հայրենիքի զինվորը լինելու վեհ առաքելությունը: Ուսումնական զորամասում վերապատրաստվելուց հետո նրանք կհամալրեն նախանշված զորամասերը եւ ամուր ու անառիկ կպահեն հայոց երկինքը։

ԱԼԻՍ  ԱԼԱՎԵՐԴՅԱՆ

Լուսանկարները՝ ՌՈՒԲԵՆ ՄՆԱՑԱԿԱՆՅԱՆԻ